Gabaygii Abaal laawe ee Salaan Maxamed Xirsi(salaan carabey), ninkaygii xortaba kaa dhigaad ximi tidhaahdaaye !!

Gabaygan wuxuu salaan u tiriyey nin uu adeer u ahaa oo uu ugu tagay Bariga Afrika. Salaan oo socoto ahaa Kiishaduna aanay wanaagsanayn waqtigaasi  wuxuu inanka adeerka u yahay ugu tagay martisoor, balse inankaas oo uu markii hore  u galay abaallo badan, wuxuu ka yeelay si aan wanaagsanayn. Wax uu adeerkii taro daaye, Salaan buu suuqa u galay oo afxumeeyey. Waxa halhays ka noqdey gabaygan tuducan:

Waxba yaanu xeerkay i marin xoolana i siine
Xaasha’e nin libin kaa xistiyey xumihii waa yaabe
Gabayga oo dhammaystirani waa kan.

1. Qaylada xaduurkii ninkay xaraqday laabtaydu
2. Xusul duubka orodkii ninkaan dhab ugu xuurtoobay
3. Ayaa Habar Xabuushay ninkii xiidka la i mooday
4. Guuraha xanbaarada ninkii xagarku ii jeexay
5. Jillabkii xadhaadhaa ninkaan ugu xajiimooday
6. Guutada xamaaska ah sidii Xabasho duullaana
7. Xaddigaa ogeydeen ninkaan xaadir uga yeelay
8. Xildhibaanka Nuux Maxamedkaan kala xadhkaynaayay
9. Xidhkii odayadheerood maalintii rag is xiniin taabtay
10. Xaraamigii Olol maalintuu xilafur kaw siiyay
11. Waataan u xuubsaday sidii xuurta baalka lehe
12. Xarbigii shisheeyaha ninkaan xeebashada diiday
13. Dumarkuba xublada foosha way xanaf wareeraane
14. Balse inay xasuus daran yihiin xaylka kale mooge
15. Waxba yaanu xeerkay i marin xoolana i siine
16. Xaasha’e nin libin kaa xistiyey xumihii waa yaabe
17. Doonyuhu xawaal kuma socdaan xeelli karameede
18. Hadduu xananyar leeyahay ayuu xolad hulaaqaaye
19. Farasna wuxu xakama diid noqdaa kolu xaraamaaye
20. cidluunbaan xayuugnahay sidii xuunshadi Gubane
21. Xeegada haddaan dhalin lahaana xoog madaan ahaye
22. Xeer beegti murantaa gartay xeeli hadashaaye
23. Xubin rag isku waajahay hadday xayga ka cadaato
24. Afku wuxu la xoog yahay magliga xawda ka jara’e
25. Raguunbaan xisaabtana aqoon oo xin loo diraye
26. Xikaayo iyo baaneba anaan xaraf i seegayne
27. Nin Xukaantu wada naadisoo xaadsadaan ahaye
28. Xafiiskii magaalada wixii xaalad iga gaadhay
29. Xabsigii cadaawaha ninkan xaalan uga saaray
30. Xoolaha markay timi ninkaan xulayey Geelayga
31. Waxba yaanu xeerkay i marin xoolana i siine
32. Xaasha’e nin libin kaa xistiyey xumihii waa yaabe
33. Xoontii walaalaha ahayd xodayadii Faayo
34. Xarrago qaadadkii Sulub maalintay xiito ololaysay
35. Dartiis baan xanaaq ugu lurriyey xaasidkii Buqule
36. Cabdigii xaruuriga ahaa kamaan xishoonayne
37. Xawdheerta goortaan la baxayna Xaashibay garane
38. Bah reer Dood xigtay ku ahayd kumana xaalayne
39. Hadduu Xaashi curadkii ahaa maba xilsaarayne
40. Xaaskiisa waatuu u raray xididki goor jaane
41. Xinjirtaan wafoobine kolkay xuurtu kor u yeedhay
42. Xisdii inaanan kaa galin tolkaan xog ina moogayne
43. Xasan Nuurna way marag haddii rag isu xaydnaaye
44. Waxba yaanu xeerkay i marin xoolana i siine
45. Xaasha’e nin libin kaa xistiyey xumihii waa yaabe
46. Nimankaan xannaanada lahayn Xaawa iyo Aadan
47. Xigaala an tabcaday Reer Jibriil xarawigii raacye
48. Waayadan xayaad lama kaftamo xaashir nololeede
49. Qasaalkii Xaddiyo kaa dhacaad xinif lahaydeene
50. Xuska dhalasho waa kula sinnaa xilase kaa yeelye
51. Xiiraaga goortaan la dhacay xaasil kibirkiiye
52. Ogoobey xidaayadi dartaa kuma xoroowdeene
53. Ninkaygii xortaba kaa dhigaad ximi tidhaahdaaye
54. Xidaar baa khaliqigu ii yaqaan xay iyo maamuse
55. Xamdi baaba lay wada naqaa xeeb haddaan tago’e
56. Sida xayska roob buu nafluhu ii xiddigiyaaye
57. Ooduba xirsiga reerka way bela xijaabtaaye
58. Haddii aniga lay xidho Rabbaa xugunki meel yaale
59. Adiga oo xabeebsaday intaad kun igu xaydaanto
60. Waxba yaanu xeerkay i marin xoolana i siine
61. Xaasha’e nin libin kaa xistiyey xumihii waa yaabe
62. Xintifaalo doqoneed nin ragi waa xaasiliyaaye
63. Xubadaan idiin dhaqanayey baad igu xujeyseene
64. Alayle xurmo haddii aan lahaa waygu xilateene
65. Ragbase kii aad xaradhaamisaa kuu xasaas colahe
66. Xawlal mariiddada mergiga xididadays goojey
67. Feedhaha xidhiidhsamay lafahan xuubku ka idlaaday
68. Jidhkaygii xariirta u eekaa xaaluf quruxdiiye
69. Haduun baan xaraarugay sidii Xamilgab-awryaale
70. Xafta waxaydin ii laba listaan xooxdi la i maalye
71. Ifka intaynu xay nahay haddaynu xiiso kala waynay
72. Aakhiro Rabaa inna xukumi xaqa inoo yaale
73. imikaan nabsiga kuu xaddilan xaynka kuu sudhaye
74. Xagaygii wax dhigo haatanaan kaa xaliil jabaye

Be Sociable, Share!