Wararka

Muduciga Kalgacal (Gabay) Abwaan Mubarak Qoorubaxay

qoorubaxay21Sweden(saraarnews) gabaygan oo la yidhaaho Mudduciga kalgacal waxa tiriyey Abwaan Mubarak Maxamed Nuur (qoorubaxay).
Tixdan gabayga ah oo hoga tusaalayn iyo jawaaba u ah  tixdii Muxubo heelood uu soo tiriyey Maxamed aw Cali Cartan haldeeq, waxay soo baxday 18/11/2006.

Murti gabayga suugaanta mudan meeris iyo hooris
Geeraar la maaxdiyo midhi arar la maansoodo
Madadaaladiisii ka tegay Madal ka baankiiye
Waa taan maluugtiisa dhigay mooro loo dayo’e
Anigoo dan uga maarmay bay wax i majiireene
Tixdaa caawa aad marisay baa daartay mililkiiye
Maahmaahdu waa sheekadaad kicisay maashaaye.

Hadday maad u haysteen cishqiga amase maaweelo
Dar horuu makalay baan arlada madhax ka oolayne
Cilmi baa masaalka ugu yaal caashaq mellegiiye
Hadraawiba wuxuu Inan milgale tix ugu maansooday
Alleylehe markhaataad ka tahay muran la’aaneede

Ninba miiladuu maalinbuu dacar magaabshaaye
Anigaygan maalmahan tashigu waygu moosnaaye
Sida uu jacayl ii dhex maray waan mulaaqnahaye
Maankiyo qalbiga way ku taal Maxamed deeqoowe
Yaasmiin sidii laygu maray meeluun bay maqane
Anigaba sidii laygu mudday waw maraysnahaye
Quruxdeeda mawluhu ku simay ama ku miisaamay
Haddaan midhadh tilmaan ula kacoo anigu muuneeyo
Anigoon macaashsiin haween ways mukuriyaane
Meel aan ku diidaanan arag inanta Muusoowe

Maalintiyo habeenkii ma ledo muxubadeediiye
Waa midaan masaalkeed la arag maqala sheegayne
Milge dumar haduu qurux lahaa taydu magac dheere
Dibnaheeda madow iyo ilkaha muunka ka cadaatay
Haddii aad mataanaha indhaha milicsigood eegto
Miisaanka camankiyo sankuu mawle ugu deeqay
Timaheeda madaxiyo garbaha wada mushaaxaaya
Ee meelku dhererkii miskaha mayraca u dhaafay
Midabkeeda maariin casaan sida mas ciideeda

Luqunteeda kala miirantaye gerri la moodaayo
Dhexda aan mid kale eebbe siin madag sideediya
Kubabkeeda mayraca indhaha loola muhanaayo
Muuqaal hanaankay maryaha ugu mushaaxayso
Waa waxa macnii kale hablii uga masayreene.
Waa waxaan miliilica darteed ugu maqnaadaaye
Waa waxaan marley kale darteed ugaga maagaaye
Waa waxaan u moodaa iyada taan arkee mudane
Waa waxaan malaysiga darteed hadalka moodaaye
Waa waxaan manfaca iyo cunadi  uga madluumaaye
Waa waxaa afkaygu ugu mamay magacyadeediiye
Waa waxaan murtidi iyo tixii aan u maakubaye
Waa waxaan mulaaxduu Lahaa meerisyo u tebay
Waa waxaan asxaabtii mudnayd uga maqnaadaye

Afartaa ma miidaaminine marin ma qaadsiiyey
Gudgudiyo mahiigaan sidii ma idin maasheeyey
Muduciga kalgacal caashaqii ma ugu muusooday
Anigoon macnaha seejinayn ararta aan meershey
Ma mutuhinin gabaygee haddana aan midh kale taabto.

Jacayl waa masiibee hadii lagula soo maagay
Oo aad mahwiga iyo shirkaa madal ka soo sheegtay
Inan muunadloo wacan haddii maanku daba rooray
Waa inaynu  caqliga Muudina  tallada maallaaye
Waa inaynu maaliyo aduun madaxa doonaaye
Waa inaynu Mudan aabbaheed yarad u miidhnaaye
Waa inaynu boqol moodhikaar madasha geynaaye
Welibana intii muunad wacan meerinaa galabe
Waa inaynu odaygooda mudan midigta saaraaye
Waa inaan marwadi hooyadeed magac u yeelaaye
Waa inaan magayniyo la xidid ugu macnaynaaye
Waa inaan malkada ay degaan wada maqsuudaaye
Waa inaynu meeqaanka sharaf mahadho reebnaaye.
Waa inay iyana mudantidood male ka daayaane
Waa inay middii laga calmaday nala malxiisaane
Waa inay milguhu sidu ahaa inanta meershaane
Waa inaan macaanaynta xidid kala mabsuudnaaye
Waa inay inoo mahadiyaan gobiyo meesheede.

Be Sociable, Share!

The Latest

To Top