Suugaanta

Gabay: Maandhow ixsaan lagama tago, eed haddaad faliye, Sayid Maxamed Cabdille. Xasan.

sayid maxamedBurco(saraarnews)labadan gabay ee  soo socdaa waxay dhex mareen   Ismaaciil Mire oo fudayd laga waaninayo iyo Ina Carro Seed Magan ( Sayid Maxamed Cabdille Xasan), ka dib markii Ismaaciil Mire  oo korjooga la socotay tageen meel u dhow buurta Ceeldhaab, ka dibna ay arkeen reero aan daraawiishta taageeri jirin.  Kolkaasna uu Sayidkii  u diray gabay farriin ah ee kuu yidhi:

 

Aabbow xaqeygii ma deyn, igana duugowye
Nimankii ikhwaankii dilaa, meel dhow soo degaye
Dabka xalay badweyn iiga baxay, waan ku diirsadaye
Dantayna ma aha inaan daayo oo, dib uga laabmaaye
Raggii aan la dibad meeri jiray, doorki laga laayey
Kolkii shalay Ammaan laga dilay, dib isu laabeene
Waa daaluqsaday Xaashigii, ugu da’ weynaaye
Ducaaliyo ma wadin Jaamac-Cudur, inay dambeeyaane
Kollay habar yar dooxdaan Ilaah, deeqi waa badane
Duullaanka may soo baxshaan, dagayey iidoore.

Gabayga Sayidkii markuu maqlay, waxaa u muuqatay hadalkaasu inuusan Ismaaciil ku habboonayn, oo uu ka sii digay,oo laga war helay wixii daraawiishtu samayn lahayd, dumar iyo caruur layskii horena la eeday,  dabadeedna wuxuu jeediyey canaan waayeel, wuxuuna yidhi:

Ismaaciil Mirow taladu waa, eyddin kaa maqane
Maandhow ha uugaabin waa, ababa’daadiiye
Maandhow adduun wuxuu ahaan, waadan idihayne

Maandhow aqoonxumadu waa, ku ambineysaaye
Maandhow ninkaan edeb lahayn, waa Allow sahale
Maandhow aqliga ha iska lumin, Eebbahay magane

Maandhow raggii aakhiraad, igu ohomsiinee
Maandhow sidii ibilka way, ololinaysaaye
Maandhow waxaad igu akhriyi, uurkutaalada’e

Maandhow ikhwaanki ma deyn, urugadiisiiye
Maandhow alleylkii dhaxaan, alaladaayaaye
Maandhow ilmada ha iga qubin, kaa afeeftamaye

Maandhow nin umal saaqayoo, uurxun baan ahaye
Waxaan awlaxaw rabinayaa, aarsi dirireedee
Maandhow awaal dagatey baan, aawilahayaaye

Maandhow Ducaaliyo Ammaan, waayey araggoode
Maandhow kuwii iga ajalay, waa orkaa bixiye
Aniguba ayaamaan lahaa, ha isallaaweene

Maandhow abaabaa ku wadi, abadankaagiiye
Maandhow dadkaad eriday baan, ururinaayaaye
Maandhow ooho baan odhan sidii, aaran baadiyahe

Maandhow intay iigu iman, odayadoodiiye
Maandhow iliilahakaney, awr ku soo furiye
Maandhow berray soo ekaan, adhi sidiisiiye

Maandhow ixsaan lagama tago, eed haddaad faliye
Maandhow ninkaad iniqdo, waa ku oggolaadaaye
Maandhow haddaan inamo raro, way i aaminiye

Maandhow idday waxaan ku bogan, waa irdha la’aane
Maandhow ninkaan aa’i, waw aamusahayaaye
Aflagaaddadaadaan ka baqi, inay ogaadaane

Maandhow sidii aarka dhici, waw il galaclayne
Maandhow ilaaq baan ku wadi, aarankaan diliye
Maandhow ku eersaday hadday, iga ufoodaane

Maandhow ugaadhaba xirkaa, laga agloolaaye
Maandhow urtaan mari sidii, adamaddoonkiiye
Maandhow arbaha ha iga didin, oofataan ahaye.

Be Sociable, Share!

The Latest

To Top