Todobaadkan iyo weriyaha laanta curdinka Qallinkii Hamud Duale

Maanta wuxuu wlc soo tebinayaa Sedexda habrood ee Somaliland iyo labada oday xaalada ay ku sugan yihiin. Habraha iyo odayaasha qalad ha ka fahmina waa kuwii qabaa’ilka iyo siyaasada ee ma ah haween caadi ah.

Badmaax:
 Olohii doorashooyinka deegaanku halkuu marayaa?
WLC: Ololihii doorashooyinka deegaanka waxaa hadheeyey tartanka loogu jiro ciddii dumaali lahayd habrihii odayaashoodii ka dhinteen.
Badmaax: Kow
WLC: Habartii uu qabi jirey M/weynihii labaad ee Somaliland weli asaydii ayay sidaa. Guurkeeda waxaa ku tartamaya kuray, baargoosyo, macangeg iyo kuwa abaawaraheedii badh iyo waaxtoona ka gaadheen. Waxaa ku jirtaa waayahan oo kale:
Sida naag ninkeedii mudnaa
mawdku kala qaaday
oo macangaga liitaa u hadhay
yeeshay meherkeed
oo in ay ka meermeeriyaan
magane dooneysa
madoobaadayee miyay murugtey laabtaydu


Badmaax:
 Oo ma askari  macangaga Liitaa. Maxayse ku tashatay?

WLC:
 Mooyi wuxuu yahay, habrta carruurteeda ayaa innoo sheegi, Laakiin Shariifo hadana hoostaas ayay ka beedalaysa. Haddaba markay aragtay  bilicdeed iyo bilideeda, markay aragtay boqorkeeda iyo dhaclaheeda, markay midabkeeda dhiinka muraayad ku daawatay, markay aragtay bangigeeda in maal ku jiro; gaabsi mooyee guur danbe iyo dumaal way ka dhaaratay. Waxay tidhi qof nin keliya geed ugu xidhnaata buruudkaygu ka weyn. Weligiinba isdhaaf dhaafa oo kuududka ku tartama in aad kala danbaysaan. Garaadkaygu wuu dhaafsiisan yahay xaajadii gumeysiga.

Badmaax:
 Habartii kale iyada ma la dumaale?

WLC:
 Habartii kale ee uu ka geeriyoodey M/weynihii u horeeyey ee Somaliland iyadana waxaa ku tartamaya dumaasheedii kuray, baaro goysyo, nin cad iyo nin madaw iyo qaar aan badh iyo waaxtoona ka gaadheyn Alla u naxariisagii golxada lahaa. Waxaa ku jirtaa baroordiiq: 
Gaagaabsayaa iyo isagu geesi hadalyaaba
Go’aankii la wada raaci jirey gocanayaa mooyi.
Alla golxaalow wuxuu ahaa geesi nabadeed.

Badmaax:
 Kuwaas alla badaye, may miduun ka xushaan.

WLC:  Waa habar magaaloo hoostaa ka beedalaysaa. Haddaba markay aragtay laxaadkeed, balladhkeeda, baaxadeed, balaceeda, bari iyo galbeed gudban, waxay tidhi nin keliya oo aan u qabaano baawarkaygu ka weyn. Gaabsi mooyee, guur ma haybsado, dangalana ma noqon karo. Weligiinba siyaasiyo buurto Daalo korkeeda soo kuudud xumaad.

Badmaax:
 Habartii sedexaad, iyada siduu yahay xaalkeed?

WLC:
 Habartii sedexaad duqeedii waa nool yahay, baalayana ma hayso oo waa M/weyne. Tartan kama dhex oogna. Waxay qaadaysaa:

Mar haddaan Muftaaxi midigtaa ku haysto
Meeshii aan doonaba waa in aan mushaaxaa
Waa in mushaaxaa.

Habartu  waa Raaliyo, gaabsi ma taqaan, gogol dhaaf laguma xanto, gardarada sokeeyaha laguma xanto, waa u daacad saygeeda, isagaa ku adeegta. Geesiga qaba weli dalawadiisii doobigeedii may dhimin, intuu nool yahayna nin kale dhudhunkeeda qaban maayo. Waa siday kuwa kalaba ahaan jireen markay duqaydeedu noolayd amma u doonanayeen.

Badmaax:
 Sedex habrood iga daa warkooda, labadii oday maxay ku danbeeyeen?

WLC: 
Labadii Oday mid wuu qooqay oo waa xaqsoor. Midna wuu da’ furay oo waxaa lagu xamanayaa ‘cadgeel iyo wax baa loo cummaamaday’.

Badmaax:
 Oo xaqsoor dumaasha habraha miyaanu xaq u lahayn hadduu qooqay?

WLC: Markay guur seegaan, ee gayaan seegaan ee gaabsi seegaan, isaga ku gacan danbayn oo dumaali karaaya. Macangag liita ma ah, maatina ma ah aan weli qaan gaadhin, nin loolabayna ma ah, Agoon maal kamuu dhicin,  maatina ma ah oo  waa xadi rag oo weli  tamarinaya.

Badmaax: 
Habrahani Meher La’aanta ku roon yihiin. Warkaasi aad sheegtayna war xun ma ah mar hadday habri fahmeen xeeladaha siyaasiga dantiisa gaarka ah u adeegsanaya oo ay guurkoodii iska dhaafeen.

WLC: Oo adigu badmaaxo maxaa damacday?

Badmaax: Anigu sida Gaboose iyo Biixi sodohaha rag kale qabo kuma toobad seego. Afka way ka weyn tahay Bari baan idin taageeree maanta i tagaara. Abaalkaan shalay galay maanta ii guda. Waad i jeclaydeen maxaad immika ugu nacdeen. Siyaasada la isma amaahiyo, abaala la iskuma taarto, dumoqraadiyaduna kaltan ma ogola iyo farmasiga soo jeedka leh. Tab iyo xeel baa la doonayaa. Dadweynaha codaynayaa, Mar haddaanad arrin iyo adduun hayn, siyaasi allow ka bul dhe.
Anigu intaa kala guri lahaa guur an ka la’aado.

Be Sociable, Share!
Warning: scandir(): open_basedir restriction in effect. File(/customers/b/3/5/saraarnews.com/httpd.www/wp-content/themes/city-desk/../../../../) is not within the allowed path(s): (/customers/b/3/5/saraarnews.com/httpd.www:/customers/b/3/5/saraarnews.com/httpd.private:/customers/b/3/5/saraarnews.com/tmp:/customers/saraarnews.com/saraarnews.com:/var/www/diagnostics:/usr/share/php) in /customers/b/3/5/saraarnews.com/httpd.www/wp-content/themes/city-desk/footer.php on line 10 Warning: scandir(/customers/b/3/5/saraarnews.com/httpd.www/wp-content/themes/city-desk/../../../../): failed to open dir: Operation not permitted in /customers/b/3/5/saraarnews.com/httpd.www/wp-content/themes/city-desk/footer.php on line 10 Warning: scandir(): (errno 1): Operation not permitted in /customers/b/3/5/saraarnews.com/httpd.www/wp-content/themes/city-desk/footer.php on line 10 Warning: Invalid argument supplied for foreach() in /customers/b/3/5/saraarnews.com/httpd.www/wp-content/themes/city-desk/footer.php on line 12