Wararka

Maanso cusub: Suugaanta Dalabta leh waxa tiriyey Abwaan Mubarak qoorubaxay

mubarak qoorubaxay

Sweden (saraarnews) Maansadan oo magaceeda la yidhaaho Hal abuurka dalabta leh waxaa tiriyey Mubarak qoorubaxay, wuxuuna kula hadlaya niman jeclaaday Abwaano aanay ahayn oo heeso jabcur ah oo milgaha ka aradan shacabka somaliland damcay inay ku kala qaybiyaan, qaybta danbena wuxuuna kula talinaya madaxweynaha isagoo maadaama mucaaradku batay , ku eegaya bal dhinaca talo bixintana.  Maansadan oo soo baxday Maanta 29.12.2012   dhegaysi haboon.

 

Audio clip: Adobe Flash Player (version 9 or above) is required to play this audio clip. Download the latest version here. You also need to have JavaScript enabled in your browser.

 

Halkan ka sii akhriso Maansada

 

Demenaantu waa halis.

Denni kacay la yaab ma leh.

 

Nin dayoobay weesaaq

Docduu aaday waw tahay.

 

Lafo duud rag baw culus

 

Awrkii doobin jiray waa

Koley waa da’a furayaa

 

Colaad laysku dabar go’o

Nabad baa ka door roon

 

Inkastaanad weli dayn

Caloow diradiraaluhu

Dogob weeye Naareed.

 

Odaygii duqoobiyo

Daa’ima caruureed

Dar alla geeridow siman

Hedna lama dawayn karo.

 

Qaninmadu duunkiyo

Daacadnimada eebbiyo

Dunta weeye Ruuxee

Maaha Duunayadoo qudha.

 

Markaan hoos u sii dego

Beri baanu derisnaye

 

Waxay daado leedahay

Waxaad doobta ridataba

Dareenkii Kalgacalkiyo

Maahmaahyo duurxula

Diiwaanka gelisaba

Horta Adigu dacaroow

Miyaad daysay Heesii

 

Wuxu yidhi dan baa tidhi

Taariikhda duuga ah

In dib loo xasuustee

Adigoo durkii iyo

Daadooy daabacba u dhigay

Xikmadii dalaysnayd

Cidi dooni maysee

Daalaadhac weeyee

Diigaanyadaasiyo

Qirinqiirkan daashaday

Ha iskala dabaasheen.

 

Inkastooy dabuubtaa

Doc ka dhaafi waydoo

Hadalkii Dam kaga yidhi

Iyadaan u duurxulin

Kuwaa maansadii dilay

Waxay daado leedahay

 

Waa deeq Aftahamadu

Daayinkeenu bixiyoo

Derejooyin kala lehe

Idinkoon Dariiqiyo

Dawgeeda garanayn

Murtidana Ka dayro ah

Dux waxaan cid gelinayn

Horta maxaad u ducataan ?

 

Hal abuurka deynta ah

Suugaanta dalabta leh

Ninka daacadnimadiyo

Dadka wadajirkiisii

Daafka ugu beeroow

Taas dameero loo sheeg

 

Dusdus laguma maalee

Haday heestu Deel tahay

Miisaanka daabaca

Yaanay dacalo dheeraan

 

Garashaa wax dabartee

Isku duubnideeday

Dawadeedu noqotee

Dubka way wadaagtaa

Dirka waad mid keliyee,

Dadka hayga kala didin

 

Adoo diidi kara Ruux

Degelkuu ku noolyiyo

Qabiilooyin haw durin

 

Nin sidaada doog qaba

Dakhar kale ha gaadhsiin

 

Adigoo dabiib raba

Ha u yeedhan daacuun

 

Deelqaaf nin kugu falay

Adoo diiqadaysnaa

Degmadaad ku dhalatiyo

Diinta hawga sii bixin.

 

Hadii dayro dhaaf jiro

Badanyiin dabayluhu

Raganimo dugaashoo

Yaan dareere kaa iman

shirka laguma duufsado.

 

Derajada Ilaah baa

Ninkuu doono Siiyee

Wuxuu diiday haw dudin

 

Iyadaan Dagaal curan

Dib waxaad u dhigan layd

Beritaa danbaysee

Lama Saydho door qudha

 

Sida Duulashii Jaan

Hadalkana ha dawdabin

Marna yuu is darayayn

Si aan dad isu moodsiin

Inaad dawdar falan tahay.

 

Sida daadka haw socon

Daaradaana haw xulin

 

Sida dooxa haw jabin

Sida shuuxa haw di’in

 

Marka dalagu jeestee

Xilliyada is doorshaan

Sida dirirka noolee

Dhul indhuhu ka daaleen.

 

Hanka waa la durugshaa

Intaad Raacdo duulaan

Aabahaa ha soo dilin

Libintaadu dooloow

Doqoniimo yay noqon.

 

Adaa daano geystaye

Waa maxay durbaankiyo

Digdigtiyo hayaaydani

 

Docda kale waxaan idhi

Maamul waa la diida

Markuu dawladnimadiyo

Duminaayo qarankee

Hogaan seegay Dawgii

Qabiil laguma daafaco

 

Waxay daaran tahay waa

Dirir geesi geli kara

Doodiisa celin kara

Gacanta ka deeqsiya

Kama dayrin weligay

Dibnahayga waxaan baray

Xaqa inay difaacaan !

 

Dul ka xaadis weeyee

Axmedoow ma dooxaa

Arin dabaqu saaraa

Xujo kaa daboolayd

Dadka maw iftiinshaa?

 

Xeerkiyo dastuurkii

Dalka aan u dhiganayee

Diintiyo kitaabkuba

U ahaa dalliilkee

Nabad lagu daleeyaan

Dimuqraadinimadaa

Ku dawaarinaynayee

weli daawad may curan.

 

Waxay daado kugu tidhi

 

Xilka qaranku waa deyn

Bulshada iyo dadweynuhu

Maalintay ku doorteen

Dumadaada saareen

 

Shalay duubcas maad wadan

Waxay Daalinkii berri

Shacbigani ka diideen

Damacaagu yuu falin.

 

Hawsha kaad u dirataa

Yaanu noqon dilaalkii

Dirindiirta noqon jiray

 

Qofka adiga kuu diga

Ha u qaadan jago doon

Meel lagaaga soo diray

 

Dabcigaaga Madaxeed

Ha daryeelo qarankee

Daacadiyo runta ogoow.

 

Shilimada dadweynaha

Ha ka dhigan dukaankii

Laba daaqadoodlee

Dayacaada ka ogoow.

 

Iyadaan dad kula socon

Cidla haw dabaal degin

 

Imisa nin daar koray

Oo kibirku daashaday

Dawlado u talin jiray

Duhur laga burburiyoon

Dambabeero laga hayn.

 

Waxay daado leedahay

Ha ku dayan Afweynii

Danyarta iyo maatida

Duudsiyey xaqoodii

 

Waxay daado leedahay

Ha u dudin amaantiyo

Dar lagaaga heesee

Ka u noqo dermada dhiga

 

Waxay daado leedahay

Dahrigaago yuu noqon

Digsi lagu muraadsado

Duub lagu shaqaystoo

Magacaaga lagu dilo

 

Waxay daado leedahay

Xisaab baa danbaysee

Dib usii xasuusnoow.

 

Be Sociable, Share!

The Latest

To Top